藝文頻道粉絲團
您即將進入之新聞內容 需滿18歲 方可瀏覽。
離開
進入【自由副刊．台語日常】 劉靜娟／麒麟鹿走去矣 － 外二章
圖◎黃子欽
◎劉靜娟 圖◎黃子欽
水彩畫佇仁愛路一間書局展覽，我敲電話去問in確實的地點。
接電話的是一个聽起來三十外歲的小姐。伊真親切，問我對（uì，從）佗位去？共我講坐佗一路公車會當佇某一站落車，行五分鐘就到。「真好揣（tshuē，找），阮隔壁是『長頸鹿美語』。」
過兩秒鐘，伊講：「毋過，in搬走矣。」
啊？麒麟鹿走去矣。
看過一齣韓國電影，劉亞仁演的《燃燒烈愛》，其中一段我上有印象：女主角表演無聲的啞口劇。伊一步一步示範：剝柑仔皮；剝一瓣起來；囥（khǹg，放）入喙內款款仔哺；共柑仔子呸佇手底。
伊的動作優雅，完全像真正咧食柑仔。
伊共男主角講：「毋免想講遮（tsia，這兒）有柑仔，愛袂記得遮無柑仔。啞口劇的重點毋是拍拚假影（假裝）啥物件存在，是愛袂記得伊無存在。」
彼遍，我真緊就揣著彼間冊店，可能也是因為袂記得「長頸鹿美語」無存在。
食枝仔冰，看電影
完成兩篇台語極短篇，感覺家己有拍拚，寫了也袂bái（差），想欲慰勞家己。按怎慰勞？和朋友做伙食飯、講天說皇帝上好。
毋過――
唉，毋知啥時陣逐家才會當隨心所欲、心無罣礙出來約會？
鬱卒一觸久仔，想著冰箱有紅豆牛奶枝仔冰，提一支出來食。
真濟年無興食枝仔冰，關佇厝內這段時間，才忽然間恢復食冰的「興趣」。
那（邊）食，那看少年的時看過赫本演的電影《窈窕淑女》；真好看。食枝仔冰，看電影，也算是慰勞家己矣。
看完，佇面冊私訊一个時常互相討論戲劇的朋友，講：「頂日咱講《狐狸新娘星》有的所在足譀（hàm，荒謬），只是國際機場的各種狀況較值得看；其實，世界有名的電影《窈窕淑女》，嘛真譀。」
一个面無洗清氣、語言粗魯的賣花女，竟然佇六個月內，予語言學者改造成一个氣質高雅、英語發音標準、講出來的話也袂落氣的淑女；會當參加上流社會的舞會，和王子跳舞，甚至騙過一个語言專家，講彼位神祕的女子是匈牙利的公主！
短短的時間內，就有法度予一个久長佇基層社會生活的賣花查某內外大變身？欲變腔口學會曉上標準、正統的英語就無簡單，免講氣質的變化；腹肚內若無文化的修養，敢有可能？
朋友講：「戲劇本來就是愛有戲劇性；譀是譀，好看就好。而且，赫本的氣質無人比會著，電影內底的歌也足好聽。」
確實，真濟好看的連續劇論真講起來，攏加減有無合理的所在；毋過，你若佮意（包括演員），就袂去管小部分的缺點；敢若愛一个人，就承受伊的全部。
而且，《窈窕淑女》的歌確實足好聽；電影看煞（suah，結束），遐的歌佇我的頭殼內直直唱。唱到lots of chocolate for me to eat 時，我也足想欲食chocolate。
花盆的小自然
頭前欄杆邊的三个長盆仔，我慣勢種一種抑是兩種草花，可比矮牽牛和馬齒牡丹；四季海棠和紅龍草；鬥陣開起來，較有氣勢，也較整齊。
幾個月前種的非洲鳳仙，花期過去，葉仔蔫（lian，枯萎）去，連枝也焦（乾枯）去；照講應當去買新的花來補，毋過，疫情嚴重，毋敢去花市；所以，凊彩櫳櫳（疏疏）插幾枝仔斑葉紅雀珊瑚和彩葉草，就準算。這攏插咧就活，較袂失敗。
邊仔就隨在伊去發。
結果，三个長盆仔變做小小的大自然；家己發出來的有日日春、犁頭草、小葉冷水麻、五蕊油柑；上捷（tsia̍p，常）看著的四葉草（幸運草），也無缺席。照起工種花的時，遮的（這些）「野草」，我一定會隨時薅（khau，拔）掉；這陣，無政府狀態，in自由發揮，我沃水就好。上合我的意的是兩欉薟椒（辣椒），其中一欉有兩尺外懸（高）矣，我期待in開花結子，上好是較長、袂足薟彼个品種。
我想著《所羅門的指環》，彼是寫動物行為的冊，足趣味。一篇〈魚缸〉，作者勞倫斯教人佇玻璃缸內底囥（khǹg，放）沙、幾支仔水草，倒幾桶水；然後用破襪仔做的魚網去家己厝附近溪溝仔撈幾尾魚和小小的生物擲入缸內。按呢，就是一个動植物生態平衡的世界。「一旦一个人看著大自然上神奇、上幼路（精細）的變化，伊若無做詩人，就只好做自然學家。」伊按呢寫。
我的囡仔細漢的時，阮兜（tau，家）有一个六、七尺長的大魚缸，囡仔飼魚飼甲興tshih-tshih；孔雀魚、霓虹燈魚、血鸚哥、斑馬魚……毋知飼過偌濟種，可惜in一遍一遍死去，逐家一遍一遍傷心。後來我講莫閣買魚矣，來做勞倫斯彼種上天然的魚缸。
結果按怎？當然是無成功。佇都市，「去附近溪溝仔罟（koo，撈）幾尾魚」的要求就有困難；所以阮兜無出詩人，也無出自然學家。
彼个大魚缸早就擲掉矣，這陣，三个長花盆，隨在鳥仔抑是風抑是蝴蝶做媒人，愛發啥就發啥，無受著我的干涉、迫害，家己做民主的頭家；雖然看起來亂亂，無整齊，也無氣勢；毋過，是一个天然的生態世界。徛（khiā，站）佇花盆邊，恬恬仔欣賞，也有解鬱的應效。而且，為著欲知影來遮安家落戶的是啥物草，我請教朋友、上網路查資料，捌（認識）著一寡以前無關心的植物；照這个範勢（情況），無定著有一日，我會成做自然學家呢。●
網友回應