【自由副刊】雅子／天送埤之歌

天送埤老家菜攤舊照，影中人為作者母親三妯娌與堂哥。（雅子／提供）

◎雅子

．

最近聽人講

發電廠有枝仔冰生產

彼暗，我就夢見轉去宜蘭

踅過彎彎斡斡的北宜

看到龜山島才吐大氣

經過羅東、三星，我轉來到天送埤

．

一排低厝仔

自作木匠的阿公搬來遮

我出世佇轉角的菜擔

一口灶愛飼二、三十个人

孫仔賤到爬去厝頂掀厝瓦

冤冤吵吵，儉儉捻捻，頂真過生活

．

人講遮佮太平山的歷史牽作伙

埤仔內的水流落去安農溪

聽講生分的過去，若親像咧看戲

就親像人來客去的卜肉

擱有芳絳絳的蔥仔餅

彼當時，攏猶未時行

．

上愛軁入去阿堂的??仔店

一箍五角，揬糖仔抽紙籤

若甪到檨仔乾，吃甲嘴唇抹胭脂

阿母講賣粉圓的歐巴桑小姐

伊捌共阮老爸使眼尾

恬靜的西藥房，有一个緣投少年家

．

天送埤啊天送埤

目一??已經幾十年

翻新的火車頭，鬧熱的街市，敢抑會認哩？

阮是細漢離開的查某囡仔

伊的形影，是不是夢中的

記持的故鄉

．

天送埤啊天送埤

目一??已經幾十年

厝後的圳溝、幼稚園的栱鞦，敢擱有佇咧？

阮是細漢離開的查某囡仔

伊的面容，是不是夢中的

思慕的故鄉

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法